31 август 2024

Младинскиот камп “Да растеме заедно“

Младинскиот камп, “Да растеме заедно“ одржан од 26 до 30 август 2024 година во хотел Даљан, Охрид, остави незаборавни спомени на 24 млади на возраст од 16 до 22 години, поддржани од СОС Детско село.

Под покровителство на ДХЛ (Експрес Македонија) и во соработка со партнерските компании и организации како Црвен Крст, Еуролинк, и Мотива, кампот не само што ги збогати учесниците со нови вештини, туку и со незаменливи животни искуства.

„Ова не беше само камп – ова беше можност да се поврземе со луѓе кои нè разбираат и поддржуваат. Научивме многу за тоа како да се справуваме со предизвиците во животот и како да станеме подобри луѓе,“ вели Марија (18), една од учесничките.

Кампот започна со формирање на правила на однесување и интерактивна обука за детските права. Младите брзо се вклучија во групната динамика, покажувајќи дека заедништвото и поддршката меѓу врсниците се клучни за нивната социјализација. „Кога слушнавме за детските права и начините на заштита, навистина почувствував дека не сме сами – дека има луѓе кои се грижат за нас,“ сподели Александар (19).

Вториот ден беше посветен на комуникациските вештини, водени од долгогодишни професионалци од ДХЛ. Ова беше особено важно за младите кои се подготвуваат за нивниот пат кон осамостојување и вработување. „Научивме како да комуницираме професионално преку телефон и е-маил, што е од суштинско значење за нашата идна кариера,“ вели Ивана (17). За време на оваа активност, младите носеа маички со насловот на кампот „Let’s Continue The Journey Together“ – симбол на заедничкото патување кон нивниот личен и професионален развој.

На кампот се реализираше и обука за прва помош и спасување од давење, благодарение на волонтерите од Црвениот крст. Овие активности не само што ги подготвија младите за ситуациите со кои би можеле да се соочат во животот, туку и ги поттикнаа да размислат за волонтерството како форма на лична посветеност и хуманост.

Следните денови беа посветени на обуки за успешна продажба и осигурување, организирани од Еуролинк, како и на вештини за успех, преку интерактивни вежби со Мотива. „Секој ден беше ново искуство, нова лекција. Но најважно од сè беше што сфатив дека можам да успеам, дека можам да направам нешто од себе,“ рече Марко (20).

На последниот ден од кампот, младите учесници дадоа евалуација за кампот, при што сите 24 млади истакнаа дека би го препорачале на своите врсници. „Ова е искуство што ќе го паметам цел живот. Не само заради новите знаења, туку и заради пријателствата и поддршката што ја добив тука,“ завршува Елена (21).

Кампот, несомнено, остави длабоки траги врз младите, не само преку стекнатите вештини и знаења, туку и преку емоционалната поддршка и растењето што го доживеаја заедно. Претставуваше важен чекор на патот кон нивната независност и личен развој, подготвувајќи ги за предизвиците кои следат и за нивното идно вклучување во општеството.