Министерот за социјална политика, демографија и млади во посета на СОС Детско село

Во рамките на посетата на министерот за социјална политика, демографија и млади, Фатмир Лимани, на СОС Детско село во Скопје, беше истакната важноста на грижата за децата и поддршката на згрижувачките семејства.

СОС Детско село, како водечка и лиценцирана организација, моментално поддржува 74 згрижувачки семејства во кои се згрижени 142 деца, а преку својот Центар за поддршка на згрижувачки семејства активно работи на унапредување на нивната благосостојба.

Соговорниците го истакнаа значењето на згрижувањето и улогата на згрижувачките семејства како форма најблиска до семејството, од каде произлегува и правилниот раст и развој на децата без родители или без родителска грижа.
Министерот Лимани изрази подготвеност за градење партнерски однос со СОС Детско село во креирањето законски решенија и унапредување на згрижувањето, форма која во изминативе години бележи позитивни искуства.

СОС Детско село има големи очекувања од Министерството за социјална политика, демографија и млади и го поздравува новото преструктуирање со цел посилен фокус на темите од социјална заштита и младите. И понатаму ќе останеме стабилен партнер на државата во испорака на клучни социјални услуги во заедницата за најранливите категории, но исто така како и досега сме подготвени да се вклучиме во работни групи за унапредување на законската рамка во интерес на децата и младите.