16 август 2024

Летен Камп кој ги поврза срцата на децата без родителска грижа од целиот свет

Летниот одмор во Калдонацо, во кампот на СОС Детско Село, не беше само обичен одмор, туку вистински празник на пријателството и заедништвото за децата од целиот свет. Нашата група од 39 деца и 8 едукатори уживаа седум дена во кампирањето, исполнето со многу дружење, забава, спортски активности и пливање.

Овој камп беше идеална можност за децата, кои имаат поминато низ тешки животни искушенија, да се опуштат и да заборават на своите грижи. Преку внимателно планирани активности, тие не само што се забавуваа, туку и учеа важни животни лекции – како да бидат одговорни, како да ја градат својата самодоверба и како да развијат силни социјални врски.

Децата учествуваа во разни спортски активности, играа тимски игри, пливаа и се забавуваа во водата, а сите овие активности ги обединија во еден складен и хармоничен колектив. Со секој поминат ден, тие се зближуваа, градејќи пријателства кои ќе траат многу подолго од времето поминато во кампот.

Овој камп не беше само простор за забава, туку и платформа каде децата од различни културни, јазични и религиски потекла успеаја да ги надминат своите разлики и да создадат заедница на љубов, доверба и сигурност.

Интеракцијата со врсниците им помогна да ги развијат своите социјални вештини, додека успехот во различните активности ги поттикна да се чувствуваат сигурни и вредни.

Секое дете се врати дома со куфер полн со спомени и срце исполнето со среќа. Овој камп беше пример за тоа како вистински структурираните активности и поддршката од СОС Детско Село можат да направат длабока и трајна промена во животот на децата, овозможувајќи им да растат со чувство на припадност и сигурност.

Од срце им се заблагодаруваме на нашите донатори кои го овозможија ова незаборавно искуство. Друштво SONIX, Vitaminka A.D., Kromberg & Schubert, Diners Club Macedonia, Diaverum North Macedonia, Makedonijalek, Д-р ПАНОВСКИ АД Скопје, НОМАС 79 Охрид, АД ИЛИНДЕН Струга, Avtonova (Citroën importer for Macedonia) Скопје, Capital Bank AD Skopje, ЕЛЕКТРО КОП, BOROV DOL mine Радовиш, НА ВА ДА Охрид, eXpecta Medical Скопје, AD IGM Elenica Струмица, ЈП ДРЖАВНИ ПАТИШТА.